TENGGARONG – Sida jajaran RSUD A.M. Parikesit Tenggarong Seberang segala karyawatinya makai kebaya nasional ngan karyawan nya makai baju batik ngan daerah di rangka mpringati Hari Kartini ke-138 nya jatu pas hari Jumat 21 April 2017 kemai. Plt Kepala Sub Bagian Hukum ngan Humas RSUD A.M Parikesit embok Widiyasih, SKM nyebut mun tradisi makai baju tradisional di momentum Hari Kartini ne dah dikerjai stiap tahun, makanya hal nya tegak itu mandik jadi masalah ntuk tenaga kesehatan ngan dokter dalam njalankan tugasnya. 

 “Segala Karyawati makai baju kebayak seharian penoh. Hal ne jua belaku ntuk sida dokter ngan perawat pas sida nganuikan pelayanan ntuk pasien. Tapi yahak tu tekecuali ke sida dokternya lagi ngerjaikan tindakan-tindakan khusus, ne tujuan supaya aktifitas ngan kesterilannya mandik teganggu," ujenya . Menurut leh embok Widiyasih, baju kebayak ala Kartini ne jua bedasarkan ngan surat edaran sekretaris daerah nya nyuruh supaya makai baju tradisional pas Hari Kartini. 

Embok Yanti salah sorang perawat di RSUD A.M. Parikesit ngaku amun nya gawal makai kebayak pas mperingati Hari Kartini. "Saya bujur gawal beneh, ngingat ngkan perjuangan RA Kartini," bunyinya.

Bunyinya lagi Yanti, semangat mberikan pelayanannya tebaik ke sida pasien nya bekunjung ke RS. "Mandik da nya beobah, biar ngan baju kebayak ala Kartini, pelayanan kami tetap bejalan normal,". Ujenya ge. (KP.04-medsi01)