TENGGARONG – Wakil Bupati (Wabup) Kutai Kartanegara (Kukar) busu Edi Damansyah ndatangi  buka puasa bersama sekalian  mbukak pengajian Sarah As Maul Husna sida Warga Lembaga Dakwah Islam Indonesia (LDII) Kukar, pas Sabtu (25/6) kemai di Masjid Hayyun Mubarok, Tenggarong. Di  sambutannya busu Edi Damansyah mbawak’i ke sida segala warga LDII supaya  nguatikan keyakinan ngan semangat ntuk trus nerusikan pembangunan di daerah.

Busu Edi jua mbawak’i ke sida pengurus LDII supaya tetap embangun daerah ne, di atas pondasi keimanan ngan ketakwaan nya kuat ngan kebersehan jiwa ngan jua kesucian nurani, tegak mana nya dah diajarkan Rasulullah. Ngan yakin ngerjaikan ajaran tu, ujenya busu Edi, Insya Allah daerah ne kendia endak jadi daerah nya maju, sejahtera ngan bekeadilan ngan jua bemartabat. “Semoga aja di  perjalannya daerah etam ne slalu ndapatikan limpahan rahmad, taufik ngan hidayah dari Allah SWT nuju daerah Baldatun Toyyibatun Warrobun Ghofur,” ujenya.

Busu tu balik negasi, lamun LDII ne iya hak sebagai odah ngan sarana sida Da’i, Mubaligh, Mubalighot dalam ngkaji ngan ngerjaikan karya dakwahnya, nyampaikan ngan nyebarluaskan agama Islam sebagai rahmat ntuk seluruh alam. “Semoga aja visi LDII kemukaknya bisa teujud ngan jadi  organisasi dakwah Islam profesional nya sanggup meujudkan manusia Indonesia nya tekun beibadah ke Allah SWT, kompetitif bebasis tabiat jujur, amanah, kerja keras, kompak ngan bekerjasama ngan baik,” ujenya.

Sebelum busu tu nghabisi sambutannya, sida jua beharap kepada LDII ne bisa jadi wadah internalisasi ngan aktualisasi nilai-nilai keagamaan dalam masyarakat. “Saya beharap LDII Kukar sebagai organisasi sosial keagamaan secara nyata jadi odah keagamaan an numbuhkan spirit perubahan sosial nuju kemaslahaan, termasok melihara akhlak masyarakat ditengah era globalisasi,” mittu ujenya ge. (HMS.DI.04)