TENGGARONG - Sekda Kutai Kartanegara (Kukar) busu H Marli balik ngumpulkan Organisasi Perangkat Daerah (OPD), temasok perwakilan bubuhan sida pedagang ngan pengelola pasar swadaya masyarakat, ngenai rencana pemindahan pedagang nya maseh ada di pasar lawas Tangga Arung ke pasar tradisional Mangkurawang, di Ruang Rapat Sekda, Kamis (26/1/2017). Di pertemuan tu, busu Marli mintak supaya apa nya dah jadi komitmen besama dalam mindahkan pasar ne harus secepatnya terealisasi. "Bupati Kukar mbok Rita Widyasari minta supaya sisa pedagang nya ada di pasar lawas behancapan dipindahkan ke pasar Mangkurawang," ujenya. 

Busu Marli njelaskan, dari data pedagang nya maseh tesisa di pasar lawas ada 243 pedagang. Pemindahannya endak dikerjaikan di pasar swakelola masyarakat nya dah dipolah dikawasan pasar Mangkurawang. "Dari 243 pedagang tu 200 petak diantaranya dah disiapkan, ngan maseh ada kekurangan 43 petak ngan ne endak secepatnya dipupusi leh sida pihak pengelola supaya dipolahkan lagi ngan jangka waktu 15 hari kehadapne," ujenya. 

Hal nya sama disampaikan Kepala Dinas Perindustrian ngan Perdagangan busu H Surip lamun petak nya dah dipolah dikawasan pasar Mangkurawang bejumlah 200 petak ngan sisanya endak dikerjaikan dalam jangka waktu 15 hari kehadap ne. "tapi biaya retribusi ngan biaya pinjam sewa nya maha nya di  dibebankan kepada sida pedagang ngan pihak pengelola pasar swadaya masyarakat ne maseh dalam pembahasan," bunyinya. 

Tapi jelas busu Surip tegak apa nya dikesahkan Bagian Perekonomian Setkab Kukar lamun, besaran biaya ne jangan sampai melebehi dari retribusi pasar nya dikelola leh pemerintah, supaya mandik nimbulkan kecemburuan ngkan retribusi. "Penetapan retribusi ne maseh dibahas ngan kendia endak ditetapkan lewat keputusan daerah, pstinya hak semangat perjanjian sewa menyewa antara sida nya berempu lahan ngan pihak pedagang mandik harus tinggi ngan petak nya dikelola leh pemerintah supaya ada keadilan disitu," jelas leh busu Surip. (PK.04-mesi01)