TENGGARONG – “Kemerdekaan etam nya wayahne, mandiknya hadiah berian maha dari urang lain. Tapi ne hasel perjuangan nya tanpa pamrih. Sida Pejuang dah gorbankan segala nya diempuinya, mandik tekecuali nyawa,” bunyi leh Bupati Kukar busu Edi Damansyah sebelum melepas sida peserta Napak Tilas di Monumen Perjuangan Merah Putih Sangasanga Muara, Minggu (26/01/2020).

Menurut leh busu Edi jua, peringatan tu iyahak peristiwa nya jadi bagian dari sejarah perjuangan Bangsa Indonesia dalam mpertahankan jati dirinya, sebagai bangsa nya merdeka ngan berempu kedaulatan ngkan tanah tumpah darahnya iyahak Indonesia.

“Ya, kemerdekaan jadi warisan sida Pejuang ntuk etam, supaya bisa hidup jadi manusia nya bedaulat ngan hidup bebas, merdeka dari penjajah. Mandik ragu, ninggalkan kepentingan pribadinya demi bejuang mbela kedaulatan bangsa. Makanya haktu saya mbawak, generasi muda, masyarakat besama-sama maknai napak tilas ntuk mbangkitkan rasa nasionalisme ngkan nilai-nilai perjuangan sida pahlawan ngan mperkuat rasa persatuan,” ujenya.

pastinya hak, generasi muda ne kendia bisa nerusikan pembangunan, supaya penting beneh maknaikan kemerdekaan dalam hal nya positif. Mandik etam pungkiri lamun ada aja urang-urang nya maknai kemerdekaan jadikan suatu kebebasan ntuk ngerjaikan apa maha nya diendainya. Sampai bepolah  hal-hal nya mandik-mandik ngan dalih kemerdekaan, kebebasan ngan hak asasi.

Padahal menurutnya di zaman nya nuntut supaya makin cerdas ngan peka, nya tepenting iyahak tegakmana caranya ngisi kemerdekaan ne ngan kerja keras ngan bebenehan embangun citra Indonesia sebagai bangsa nya kuat ngan disegani, ngan mpertahankan kecintaan etam ke Indonesia.

“Rasa cinta tanah air ngan bangsa, harus terus dipupuk ngan dijaga, mandiknya lewat pendidikan formal di sekolah, tapi jua disetiap aspek kehidupan masyarakat, misalnya ngan ncintai produk lokal etam," ujenya.

Napak Tilas iyahak nyusuri balik jalan nya pernah ditempoh leh sida pejuang ntuk ngenang jejak-jejak pejuang wayahne ngan mpertahankan kemerdekaan. Napak Tilas ne iyahak kegiatan nya betujuan ndidik generasi muda umumnya ntuk ngingatikan, nerusikan ngan mewarisi nilai-nilai perjuangan para pahlawan. Supaya generasi muda bisa sedikit merasakan ngan mahami tegakmana beratnya perjuangan bangsa dalam merebut ngan negakkan kemerdekaan ngan kedaulatan Bangsa Indonesia. (Kompin04-dokpim01)