TENGGARONG – Sida Unit Pengumpul Zakat (UPZ) Masjid Agung Sultan Sulaiman Tenggarong, tulak hari Sabtu (25/6) atau 20 Ramadan kemai dah mbukak pelayanan penerimaan zakat fitrah, zakat Maal (harta), Infaq, Shadagah ngan Fidiyah. "Kami siap nerimakan zakat fitrah Muslimin Tenggarong ngan mberikannya ke nya berhak nerimanya," uje Koordinator Humas Masjid Agung Sultan Sulaiman, busu Muliansyah , Minggu (26/6).

Busu Mul nyebut, UPZ Masjid Agung mbukak dua buting tenda pelayanan zakat fitrah, tegak di higa lawang mukak masjid atau pas di mukak Monumen Pancasila, ngan di lawang arah jalan Ki Hajar Dewantara atau diseberang jalan rumah jabatan Kapolres Kukar. UPZ Masjid Agung tu mlayani stiap hari, tulak jam 09.00 wita sampai pas endak Sembahyang  Dzuhur, habistu diteruskan lagi pas  habis sembahyang Dzuhur sampai ke jam 17.30 wita. Lamunnya ntuk malam, pelayanan UPZ Masjid Agung bukak tulak jam 20.30 wita (habis sembahyang teraweh) sampai ke jam 23.30 wita.

Busu tu nyebut lagi, mun ada brapa urang nya betugas UPZ Masjid Agung, tegak nya tukang ncatati, ngan petugas penimbang nya siap melayani atau nerimakan kewajiban Muslim dalam njalankan salah satu rukun Islam tu. Selain mlayani penerimaan zakat fitrah, UPZ Masjid Agung jua nerimakan zakat Maal (harta), Fidiyah, Infaq ngan Shadaqah. "Insyaallah kami endak ngelola amanah dari sida Muzakki (Urang nya mbayar  zakat.red) ngan sebaik-baiknya," ujenya. 

Sida busu Mul jua beharap Muslimin bisa behancapan ngerjaikan Zakat Fitrah tu. "Lebeh cepat lebeh baik, supaya nyaman kami mengumpulkan Zakat Fitrah tu, nya habistu endak diberikan ke nya bujur-bujur  berhak nerima,". Ntuk diketahui Kementrian Agama (Kemenag) Kutai Kartanegara (Kukar) dah netapkan kadar Zakat Fitrah 1437 Hijriyah ntuk wilayah Kukar, khususnya kebentuk pitis tunai, jadi tiga tingkatan. Iya hak nya tetinggi sebesar Rp 40 ribu, menengah Rp32.500, ngan terendah Rp 25 ribu per urang.

Lamun Kepala Kantor Kemenag Kukar busu H Sulaiman nyebut, besar  pitis Zakat Fitrah tu bedasarkan  ngan hasel pemantauan harga beras rata-rata nya ada di pasar  nya  befariasi. "Kadar zakat fitrah tu pastinya dua stengah kilogram (2,5 kg) beras per urang, jadi lamun sipitiskan disesuaikan ngan tingkatan beras mana nya di makan sehari-hari," ujenya. busu H Sulaiman jua negasi, lamun mbayar Zakat Fitrah lebeh diutamakan ngan makanan pokok nya dikonsumsi sehari-hari.(HMS.DI.04)