PEMERINTAH KABUPATEN KUTAI KARTANEGARA

Bagian Protokol dan Komunikasi Pimpinan

Jl. Wolter Monginsidi No.1 Tenggarong 75511 - Kutai Kartanegara - Kaltim

Selasa, 14 November 2017

10:30:12 AM

WEBMAIL    BUKU TAMU    E-PANEL

Sida Warga Ukung Kendia Berempu Jembatan Nya Nyaman Ngan Aman

Bahasa Kutai    5 tahun yang lalu   
   716 Kali

Sumber Foto: Cek jembatan; Wabup Kukar busu Edi Damansyah ngan Dandim 0906 Tenggarong Letkol Kav busu Ari Pramana Sakti pas ngecek jembatan gantong dusun Ukung nya endak direhab total. (by hayru)

TENGGARONG – Impian sida masyarakat dusun Ukung, desa Jembayan Kecamatan Loa Kulu berempu jembatan nya lebeh kuat, aman ngan nyaman dilalui, supaya secepatnya tecapai. Pasalnya, jembatan gantong nya beumur puluhan tahun nya selawasan ne jadi odah jalur pertama sida nuju ke ladang ngan ke sawah sida, mulai direhab supaya dibaiki ngan sistem gotong royong.

Gotong royong rehab jembatan Ukung tu, diresmikan leh Wakil Bupati Kutai Kartanegara (Kukar) busu Edi Damansyah, Senen (31/10) hambat. Di laporannya, Kepala Desa Jembayan su Samsu Arjani nyebut mun rehab jembatan tu telaksana berkat aktifitas Wabup busu Edi Damanysah nya rancak bejlalanan  makai trail ngan sepedanya, pernah lewat ke jembatan dusun Ukung. Habistu sida melihat jembatan tu dah kurang layak,  menurut busu Arjani, Wabup langsung ngiyau pihak Kecamatan Loa Kulu, ngan perushaan nya beoperasi diparak Ukung.

"Hasilnya, Alhamdulillah sida pihak perusahaan langsung setuju endak nulungi merehab jembatan, nya dikerjakan gotong royong/ betulungan ngan sida masyarakat," ujenya. Busu Arjani beterimkaseh ke sida PT Mega Prima Persada (MPP), PT Beringin Jaya Abadi,  PT Bara Kumala Sakti, nya nyediakan segala material ngan logistik sampai ke konsumsi, total merehab jembatan gantong ngan panjang segalanya tu ada 165,2 meter ngan bentang utama 55,7 meter. lamunnya, pekerjaan rehab dipolahkan ngan cara gotong royong sida masyarakat situ, ditulungi leh sida TNI dari Koramil Loa Kulu ngan Kodim 0906 Tenggarong, selawasan semingguan hadap.

"Kami selaku masyarakat buju-bujur besyukur ngan rehab jembatan ne nya bahaya beneh mun dilewati, kawatnya dah bekarat ngan kayunya mulai jabok karna dah tuha," ujenya. Sementara, Wabup busu Edi Damansyah nyebut budaya gotong royong ne memang sepantasnya terus dijaga ngan digalakkan, telebeh pas kondisi Kukar nya ngalami defisit anggaran.  

Ujenya lagi, pemerintah mandik bisa sorangan dalam embangun daerah, tapi diperlukan jua peran sida masyarakat ngan dunia usaha atau perusahaan. Tegak halnya rehab jembatan Ukung, nya telaksana berkat sinergi antara sida pemerintah, warga, ngan perusahaan sekitar. "Apa nya dah etam kerjai di dusun Ukung ne jadi contoh sinergitas antara pemerintah, warga ngan perusahaan. Hal tegak ne bisa  diterapkan di segala wilayah Kukar," ujenya.  

Habistu busu Edi beharap pabila rehab jembatan pupus, masyarakat bisa njaga an merawat jembatan tu . Acara tu didatangi leh Komandan Kodim 0906 Tenggarong Letkol Kav busu Ari Pramana Sakti, ngan sejumlah Kepala SKPD tekait nya ada dilingkungan Pemkab Kukar, Forum Koordinasi Kecamatan Loa Kulu, aparat Desa situ jua, ngan sida warga. (HMS.DI.04)


TINGGALKAN KOMENTAR


Pemerintah Kabupaten Kutai Kartanegara
Bagian Protokol dan Komunikasi Pimpinan

Jl. Wolter Monginsidi No.1 Tenggarong 75511 - Kutai Kartanegara - Kaltim

Telp: 0541-662088 ext.314   Fax: 0541-661690
Email: humaskukar@kukarkab.go.id
Website: http://localhost:8041

STATISTIK KUNJUNGAN
Hari Ini291 pengunjung
Minggu Ini3.102 pengunjung
Bulan Ini12.530 pengunjung
Total Pengunjung230.380 pengunjung
Total Klik10.106.111 Kali