TENGGARONG – Tegak urang selebritis, Wakil Bupati Kutai Kartanegara (Kukar) busu Edi Damansyah jadi rebutan sida siswa ngan guru ntuk bepoto, biarnya cuaca panas beneh tapi ngan sabar Wabup Kukar melayani sida kanak siswa ngan guru nya endak bepoto besama ngan nya. Kejadian tu tejadi pas busu Edi Damansyah  ndatangi SMA Negeri 1 Kecamatan Muara Badak, sekalian jadi pembina di upacara bendera di halaman SMAN 1 Muara Badak, Senen (23/1). 

Arinda siswi kelas 12 IPA 3 nyebut amun nya gawal beneh bisa besalaman ngan urang nomor dua di Kukar tu. “Baru kali ne bisa betemu langsung ngan bisa besalaman, senangnya,” uje mbok Arinda nya pas diupacara tu jadi Paskibraka. Nya jua beharap kedatangan Wakil Bupati Kukar di sekolahnya bisa mberikan tambahan semangat ngan motivasi dalam proses belajar mengajar di sekolahnya, terutama dalam nulungi brapa fasilitas sekolah nya belum pupus dikerjai, “Langgar di sekolah kami dah lawas dipolah, tapi maseh belum pupus pembangunannya, moga ja Pak Wabup bisa nulungi mupusikannya,” harap leh mbok Arinda. 

Kunjungan Wabup Kukar kesekolah-sekolah ne yahak agenda rutin nya dikerjaiknnya, tulak 2016 kemai. Setiap hari Senen nya terus ndatangi sekolah-sekolah SMP ngan  SMU di wilayah Kukar. Pas ada di SMA 1 Muara Wadak,  Wabup Kukar beharap supaya proses belajar mengajar nya dah belangsung ngan baik, bisa dipertahankan ngan ditingkatkan. Nya jua bepesan supaya sida siswa bisa ningkatikan  semangat dalam belajar, menurutnya waktu belajar disekolah tebatas beneh, makanya hak tu nya mintak sida siswa bisa makai waktu dirumah nya lebeh banyak jua ntuk belajar. 

“Saya nerima informasi sekolah ne berakreditas A, pertahankan ngan tingkatkan terus prestasi nya dah ada, supaya sekolah ne bisa ncetak SDM nya beprestasi ngan mandik kalah saing ngan sekolah lain, “ uje busu Edi Damansyah. Di kesempatan tu jua nya mintak supaya sida guru bisa ngawasi kanak didiknya dalam hal pergaulan, terutama pergaulan nya bisa njerumuskan sida kanak siswa kejalan nya salah, tegak ngkonsumsi obat-obatan telarang. “ Saya mintak sida guru harus lebh ketat dalam ngawasi sida siswa, jangan sampai ada siswa nya tepengaruh ngan narkoba, ngan jua amun ada cepati padahikan kepihak bewajib,” bunyinya (PK.04-mesi02)