TENGGARONG –Supaya mehancapi ke program Sanitasi Permukiman, sida Badan Perencanaan Pembangunan Daerah (Bappeda) Kutai Kartanegara (Kukar) mlalui bidang Sarana Prasarana ngan Pengembangan Wilayah ngadakan Kick Off Meeting program Percepatan Pembangunan Sanitasi Permukiman (PPSP) Kukar tahun 2017 di Gedung Bappeda Kukar, Selasa (04/04). 

Busu Hendra Ciptadi Kepala Bidang Sarana Perasarana dan Pengembangan Wilayah nyebut mun kegiatan tu ntuk pemuktahiran dokumen Strategi Sanitasi Kabupaten (SSK), jadi pedoman penganggaran demi implementasi pelaksanaan pembangunan sanitasi tahun 2017 sampai ngan 2021,  ngan ntuk mberikan gambaran ngenai kebijakan pendanaan antuk implementasi pembangunan sanitasi kabupaten Kukar 5 tahun kehadap. 

“Namai ke tahun keempat ne dari enam tahapan pelaksanaan PPSP, Kukar namai tahapan  SSK. Mlalui dokumen ne Pemkab Kukar beharap mandiknya ndapati sumber pendanaan dari sida pemerintah semata maha tapi jua dari sumber dana dari non pemerintah," harap leh su Hendra. Kepala Bappeda Kukar busu Wiyono beharap kegiatan tu bisa nciptakan  strategi khusus ngan terinci,  supaya kegiatan PPSP Kabupaten Kukar ne  bisa terus telaksana, biarnya ngan keadaan keuangan daerah nya lagi devisit. 

Sekda Kukar  busu H Marli mbacakan sambutan Embok Rita Widyasari Bupati Kukar nyebut mun sida  Pemerintah Kukar mlalui Dinas Kesehatan dah molah studi EHRA, ngan hasel studi tu jadi bahan dalam ngerjaikan penyusunan dokumen review SSK. Apa nya dikerjaikan leh Dinkes Kukar tu, menurutnya tu yahak langkah untuk ningkatkan kualitas pembangunan ngan pengelolaan sanitasi permukiman, terutama supaya  nghindari dampak dari keadaan  buruk sanitasi. 

Embok Rita jua mbawak’i segala steakholder supaya nganukan kekuatan ngan semangat dalam ningkatikan kualitas ngan akses sanitasi pemukiman, ngan makin naiknya sanitasi pemukiman pastinya  hak di umpati ngan turunnya belanja jaminan asuransi kesehatan masyarakat. Menurut embok tu jua pabila sumber penyakit nya diakibatkan leh keadaan buruk dari sanitasi dah bekurang atau hilang, maka sida masyarakat bisa lebeh sehat, produktif, ngan bahagia. (KP.04-Medsi08).