TENGGARONG –Sekretaris Daerah (Sekda) Kabupaten Kutai Kartanegara (Kukar)busu H Marli mintak ke segala Aparatur Sipil Negara (ASN) nya ada di lingkungan perkantoran Bupati Kutai Kartanegara supaya naroh kendaraannya tu baik-baik ngandaknya, ngan mperhatikan arus tama ngan kejaba supaya mandik tejadi kemacetan. Apa nya diebutkan leh busu Marli cukup beasalan beneh, karna nya mrasa mandik puas ngan pa nya dah dilihatnya pa tama ke lingkungan Kantor Bupati Kukar ngan banyaknya oto atau roda empat ngan dua parkir sembarangan.

“Saya sempat nenongi ngan berenti diparkiran, bujur ja, saya melihat langsung ada nya parkir mandik di odahnya, sampai melawan arus pas  kejaba tama sekretariat, padahal petunjuk jalur keluar dah ada,” bunyinya pas sida mimpin Apel Hambat ASN, Senen (6/11/2017). Menurut leh busu Marli, seharusnya tu sida ASN nya makai honda atau kendaraan roda empat ne bisa markir kendaraannya ngan baik ngan naroh memang diodahnya nya dah di siapkan, supaya mandik telihat behamburan.  “Saya melihat akhir-akhir ne, parkir kendaraan baiknya  roda dua atau roda empat mandik tetata ngan baik. Gala arus tama ngan kejaba kendaraan rancak tejadi belawanan arus,” ujenya

Busu Marli nambahikan seharusnya masalah parkir ngan ketertiban  dilingkungan sekretariat ne jadi perhatian besama. Nya jua beharap ada kesadaran ngan jadi budaya tertib sida nya berempu kendaraan supaya matohi aturan nya dah ada.  “Ayok etam jaga ketertiban ngan markirkan kendaraan sesuai ngan odah nya dah diediakan ngan baik, tegaktu jua ngan kejaba tama jadi perhatian supaya mandik tejadi  hal-hal nya mandik di endak’i,”.mittu bunyinya ngakhiri. (kp04-Medsi01)